Þegar vetur víkur frá
og veðrið fer að hlýna, –
þá er fögur sjón að sjá
sólina okkar skína.

Dveljir þú í Dakotá
dag um sláttarleytið,
þá er fögur sjón að sjá
sólina skína’ á hveitið.

„Alcohol“ er hægt að fá,
helzt ef fólk er lasið,
þá er fögur sjón að sjá
sólina skína’ á glasið.

Sig að skreyta sumum hjá
sýnist æðsta hvötin, –
þá er fögur sjón að sjá
sólina skína’ á fötin.

Viljir þú í guðshús gá
að glæða trúarbrestinn, –
þá er fögur sjón að sjá
sólina skína’ á prestinn.

Ef ég þyrfti þar að fá
í þrautum huggun mína,
vildi’ ég fyrr en síðar sjá
sólina hætta’ að skína.

Þegar ég er fallinn frá
og fúna’ í jörðu beinin,
verður fögur sjón að sjá
sólina skína’ á steininn.