Er eitthvað sérstakt við annan dag jóla
er einhver sem fæddist þann dag
Á hann sér sögu, augljósan tilgang,
á hann sitt einkennislag

Í ætt var það reyndar sem rétt er að nefna
og ráðlagt að staldra aðeins við
Fjölskylduboðið annan í jólum
þann fallega íslenska sið

Organdi smákrakkar, ærðir af sykri
Unglingar fýldir með gos
timbraðar systur með syfjaða maka
og sífreðin ámálu bros

Ógiftar frænkur í aðþrengdum kjólum
og akfeitir frændur í stíl
Fjölskylduboðið annan í jólum
það er einhver klassi yfir því

Fjölskyldan saman á ný
í sindrandi seríu ljóma

Útkeyrðar mæður á meltunni liggja
í munnvikum ris ala mand
Úti á svölum er amma að reykja
alsæl með kaffi og Grand

Tengdó er komin á trúnó með afa
Tertan er farin í spað
Fjölskylduboðið annan í jólum
það er eitthvað sérstakt við það
Fjölskylduboðið annan í jólum
það er eitthvað sérstakt við það

Jólaboðið annan í jólum
þó eitthvað sé bogið við það